Show text and translation
Show word order translation guides
Change verse line numbering

Mæg ic be me sylfum     soðgied wrecan,
siþas secgan,     hu ic geswincdagum
earfoðhwile     oft þrowade,
4 bitre breostceare     gebiden hæbbe,
gecunnad in ceole     cearselda fela,
atol yþa gewealc,     þær mec oft bigeat
nearo nihtwaco     æt nacan stefnan,
8þonne he be clifum cnossað.     Calde geþrungen
wæron mine fet,     forste gebunden
caldum clommum,     þær þa ceare seofedun
hat ymb heortan;     hungor innan slat
12merewerges mod.     Þæt se mon ne wat
þe him on foldan     fægrost limpeð,
hu ic earmcearig     iscealdne sæ
winter wunade     wræccan lastum,
16winemægum bidroren,    
bihongen hrimgicelum;     hægl scurum fleag.
þær ic ne gehyrde     butan hlimman sæ,
iscaldne wæg.     Hwilum ylfete song
20dyde ic me to gomene,     ganotes hleoþor
ond huilpan sweg     fore hleahtor wera,
mæw singende     fore medodrince.
Stormas þær stanclifu beotan,     þær him stearn oncwæð,
24isigfeþera;     ful oft þæt earn bigeal,
urigfeþra;     nænig hleomæga
feasceaftig ferð     frefran meahte.
Forþon him gelyfeð lyt,     se þe ah lifes wyn
28gebiden in burgum,     bealosiþa hwon,
wlonc ond wingal,     hu ic werig oft
in brimlade     bidan sceolde.
Nap nihtscua,     norþan sniwde,
32hrim hrusan bond,     hægl feol on eorþan,
corna caldast.     Forþon cnyssað nu
heortan geþohtas     þæt ic hean streamas,
sealtyþa gelac     sylf cunnige --
36monað modes lust     mæla gehwylce
ferð to feran,     þæt ic feor heonan
elþeodigra     eard gesece --
Forþon nis þæs modwlonc     mon ofer eorþan,
40ne his gifena þæs god,     ne in geoguþe to þæs hwæt,
ne in his dædum to þæs deor,     ne him his dryhten to þæs hold,
þæt he a his sæfore     sorge næbbe,
to hwon hine Dryhten     gedon wille.
44Ne biþ him to hearpan hyge     ne to hringþege
ne to wife wyn     ne to worulde hyht
ne ymbe owiht elles     nefne ymb yða gewealc;
ac a hafað longunge     se þe on lagu fundað.
48Bearwas blostmum nimað,     byrig fægriað,
wongas wlitigað,     woruld onetteð:
ealle þa gemoniað     modes fusne
sefan to siþe     þam þe swa þenceð
52 on flodwegas     feor gewitan.
Swylce geac monað     geomran reorde;
singeð sumeres weard,     sorge beodeð
bitter in breosthord.     Þæt se beorn ne wat,
56sefteadig secg,     hwæt þa sume dreogað
þe þa wræclastas     widost lecgað.
Forþon nu min hyge hweorfeð     ofer hreþerlocan,
min modsefa     mid mereflode,
60ofer hwæles eþel     hweorfeð wide,
eorþan sceatas --     cymeð eft to me
gifre ond grædig;     gielleð anfloga,
hweteð on hwælweg     hreþer unwearnum
64ofer holma gelagu.     Forþon me hatran sind
Dryhtnes dreamas     þonne þis deade lif
læne on londe.     Ic gelyfe no
þæt him eorðwelan     ece stondað.
68Simle þreora sum     þinga gehwylce
ær his tiddege     to tweon weorþeð:
adl oþþe yldo     oþþe ecghete
fægum fromweardum     feorh oðþringeð.
72Forþon biþ eorla gehwam     æftercweþendra
lof lifgendra     lastworda betst,
þæt he gewyrce,     ær he on weg scyle,
fremum on foldan     wið feonda niþ,
76deorum dædum     deofle togeanes,
þæt hine ælda bearn     æfter hergen,
ond his lof siþþan     lifge mid englum
awa to ealdre,     ecan lifes blæd,
80dream mid dugeþum.     Dagas sind gewitene,
ealle onmedlan     eorþan rices;
nearon nu cyningas     ne caseras
ne goldgiefan     swylce iu wæron,
84þonne hi mæst mid him     mærþa gefremedon
ond on dryhtlicestum     dome lifdon.
Gedroren is þeos duguð eal,     dreamas sind gewitene;
wuniað þa wacran     ond þæs woruld healdaþ,
88brucað þurh bisgo.     Blæd is gehnæged,
eorþan indryhto     ealdað ond searað,
swa nu monna gehwylc     geond middangeard.
Yldo him on fareþ,     onsyn blacað,
92gomelfeax gnornað,     wat his iuwine,
æþelinga bearn     eorþan forgiefene.
Ne mæg him þonne se flæschoma     þonne him þæt feorg losað
ne swete forswelgan     ne sar gefelan
96ne hond onhreran     ne mid hyge þencan.
Þeah þe græf wille     golde stregan
broþor his geborenum,     byrgan be deadum
maþmum mislicum,     þæt hine mid wille,
100ne mæg þære sawle     þe biþ synna ful
gold to geoce     for Godes egsan,
þonne he hit ær hydeð     þenden he her leofað.
Micel biþ se Meotudes egsa,     forþon hi seo molde oncyrreð;
104se gestaþelade     stiþe grundas,
eorþan sceatas     ond uprodor.
Dol biþ se þe him his Dryhten ne ondrædeþ:     cymeð him se deað unþinged.
Eadig bið se þe eaþmod leofaþ;     cymeð him seo ar of heofonum.
108Meotod him þæt mod gestaþelað,     forþon he in his meahte gelyfeð.
Stieran mon sceal strongum mode,     ond þæt on staþelum healdan,
ond gewis werum,     wisum clæne.
Scyle monna gehwylc     mid gemete healdan
112wiþ leofne ond wið laþne     * * * bealo.
þeah þe he hine wille     fyres fulne
oþþe on bæle     forbærnedne
his geworhtne wine,     Wyrd biþ swiþre,
116Meotud meahtigra,     þonne ænges monnes gehygd.
Uton we hycgan     hwær we ham agen,
ond þonne geþencan     hu we þider cumen;
ond we þonne eac tilien     þæt we to moten
120in þa ecan     eadignesse
þær is lif gelong     in lufan Dryhtnes,
hyht in heofonum.     Þæs sy þam Halgan þonc
þæt he usic geweorþade,     wuldres Ealdor
124ece Dryhten,     in ealle tid. Amen.