S 1449
A.D. 964 x 975 (? 970 x 975). Record of adjustment of the boundaries between the monasteries in Winchester. English.
Archive: Winchester, Old Minster
MSS: BL Add. 15350, 8v (s. xii)
Printed: K 594; Thorpe, pp. 231-3, with translation; Birch 1889, Appendix D, with translation, pp. 131-2; B 1163; Robertson, Charters, no. 49 (pp. 102-5), with translation.
Translated: Quirk 1962, p. 175.
Comments: Robertson, Charters, pp. 348-9, reference to Abbess Eadgifu (of Nunnaminster) is perhaps an interpolation; Quirk 1962, p. 175; Finberg, ECW, no. 121, authentic; Hart 1970/1, p. 24 (no. 11), authentic, dates ? 970 x 975; Biddle and Hill 1971, p. 70 n. 5, on Winchester topography; HRH, pp. 223, 235, probably genuine, if Eadgifu is indeed Edgar's daughter then the charter must be dated c. 975; Biddle et al. 1976, pp. 267, 275, 283, 315, 322, 323, on Winchester topography; cf. S 807.
Her is geswitulod on ðysum gewrite hu Eadgar cining mid rymette gedihligean het þa mynstra on Wintancestræ syþþan he hi ðurh Godes gyfe to munuclife gedyde . 7 þet asmeagan het þæt nan ðera mynstera þær binnan þurh þet rymet wid oðrum sace næfde . ac gif oðres mynstres ar 'on' oðres mynstres rymette lege þæt þes mynstres ealdor ðe to þam rymette fenge ofeode þæs oðres mynstres are mid swilcum þingum swylce ðam hirede ðæ þa are ahte gecweme wære . for ðy ðonne Aþelwold bisceop on þes cinges gewitnesse 7 ealles þæs hiredes his bisceopstoles gesealde twa gegrynd butan svð geate into niwan mynstre ongen ðes mynstres mylne ðe stod on ðam rymette ðe se cing het gerymen into ealdan mynstre . 7 se abbod Æþelgar mid geðeahte ures cynelafordes 7 þes bysceopes Aþelwoldes 7 ealles þæs hiredes þa ylcan mylne þe se bisceop seolde 7 oðre þæ hi ær ahtun binnan þære byrig to sibbe 7 to some gesealde into nunnan mynstre . 7 Eadgyfe abbedesse þæs cinges dohter betehte ongen ðone weterscype þe he into niwan mynstre be ðes cinges leafan geteah . 7 ær ðes nunhiredes wes . 7 him se tige sume mylne adilgade . 7 he gesealde þam cinge hundtwelftig mancæs reades goldes to ðance beforan Ælfdryðe ðære hlæfdian 7 beforan þam bisceopan Aðelwolde wið þam lande ðæ seo ea on yrnð . fram ðam norðwealle to þæs mynstres suðwealle an lencge . 7 twegræ metgyrda brad ðer þæt wæter ærest infylð . 7 þær þæt land unbradest is þer hit sceol beon eahtatyne fota brad . ðyses ic geann Æþelgare abbode . 7 þam hirede into niwan mynstre for his gecwemre gehyrsumnesse a on ecnesse . 7 ic halsige ælc ðara ðe eftær me cynerices wealde þurh ða halgan ðrynnesse þet hyra nan næ undo þet ic to ðam haligum mynstrum binnan þære byrig gedon hebbe . Se þe ðis þonne awendan wylle ðe ic to sibbe 7 to gesehtnesse betweoh þam mynstre geradigod hæbbe odðe þara ðinga þe on þissan þrim cyrogafum ðe on ðissum þrym mynstrum to swytelungum gesette syndon . awende hine se eca drihten fram heofenan rice . 7 su his wunung æfter his forðsiðe on helle wite mid þam ðe symle on ælcre ungeþwærnesse blissiað butan he hit ær his forðsiðe gebete.