S 1428
Writ of the monk Edwin, child-master at New Minster, Winchester, concerning an agreement between Old and New Minster. English.
Archive: Winchester, Old Minster and Winchester, New Minster
MSS: 1. BL Add. 15350, 116v-117r (s. xii2)
2. BL Stowe 944, 40rv (s. xii)
Printed: K 922; Thorpe, pp. 321-4; Birch, Liber Vitae, pp. 96-100; Harmer, Writs, no. 113 (pp. 401-2) ex MS 2, with translation.
Comments: Harmer, Writs, pp. 387-95, 527, spurious; Ker, Catalogue, no. 274 (art. f); Hart 1970/1, p. 38 (no. 210), spurious; Keynes 1980, p. 143 n. 209, dubious; Lapidge and Winterbottom 1991, pp. xiii-xiv; Keynes 1996, pp. 56, 90, 91, 101, cannot be authentic in received form, but incorporates some convincing circumstantial evidence.
Ic Eadwine munuk cilda mæstere an niwan mynstre grete þe wel Ælfsige biscop. Ic kyþe þe laford þæt nu for þreon gearan ic læig innan minan portice anbuton nontide 7 me atewde þær þe halga Cuthbert openlice. Ic þæs swiþe bliþe wæs. Ic eode to minan abbode Ælfwine & bed hinæ þæt ic moste norþ faran to þan halgan 7 hine gesecan. Ac min abbod Ælfwine me þæs forwirnde 7 eac forbead. Ic þa fæng on minne agænne ræd 7 eode me þidær norð. 7 me þær Ægelwine bisceop mid weorscipe underfeng. 7 me geuþe God 7 þe halga þæt ic hine minan handan gewochs 7 his heafod mid kambe gekemde 7 his hær mid scearan gæcearf 7 hine eall myd nywan scrude gescrydde 7 his ealde claþas him fram genam. Sum ic þær let 7 sum ic her habbe. Nu hlaford bæþohte ic me þæt ic nefde mines abbodes leafe. 7 ic þær fore ham gæwende 7 kom me into ealdan mynstre 7 gesohte Crist 7 sancte Peter 7 sancte Swiðun 7 þe wolde, ac þu nære æt ham. Ac ic funde Leofwine þone decanum 7 ealle þa gebroðra, 7 hi me weorþlice 7 bliþelice underfengan, 7 me to minan abbode geþingodan. 7 he me bliþelice underfeng. Si Gode lof. Nu wille ic þæ kyþan hlaford Ælfsige biscop hu þeos cwydrædene fyrmæst wæs staþelod betwyx ealdan minstre 7 niwan mynstre, ealswa ic self hi hyrde þa þæ ic geong wæs. Hure hlaford sancte Alwold læig seok 7 him kom to þe haliga Dunstan of Cantwarabyrig for hine to geneosienne 7 ure ealder Æþælgar abbod þyder eode 7 munekas mid him, þæt wæs Boia þe ealda 7 Ælfric decanus 7 Ælfnoð þe metere 7 Ælfwine þæ nu abbod is. 7 þær coman munekas of ealdan minstre, þæt wæs Ealdwig 7 Wlstan cantor 7 Godwine decanus 7 maniga oþre mid him. Þa aras Boia þæ ealda munuk 7 sæt a cneowan ætforan sancte Aþelwolde 7 bed hine þæt he scolde settan gode lagan betwyx þan twam mynstran on muneca dagan, ealswa Friþestan biscop hæfde geset a preosta dagan. þæt wæs þæt þa tweien hiredas weran eall to anan on eallan godcunnesse, 7 þæt wæs gif ænig preost forðferde on aþere steda hi scolde ealle togædere kuman 7 þæt lic bebirian 7 eallne þeowdom don þe to Gode belumpe, 7 a cirichalgamdeig þe biþ binnan ealdan mynstre scoldan kuman þa preostas of niwan mynstre to ealdan mynstre, 7 þær beon to efensanga 7 to uhtsange 7 to mæssan 7 to gereorde, 7 þa preostas of ealdan mynstre sceoldan kuman to niwan mynstre æt sancte Iudoces mæssedæge eall on þa ylce wisan. 7 gif ænigan preoste mistimode on aþran mynstre ne fore he nahwider ac gesohte he his neahgeburas 7 hi him þingadan. Þa þis gehyrde sancte Aþelwold, þa hæ rede þæt hit swa wære nu on his timan 7 on þara muneka, 7 cwæþ Godes curs eallan þan þe æfre þis undidan. 7 geaf to tacne þæt hit staþelfæst beon sceolde twa brune mæssehakelan ane into ealde mynstre 7 oðre into niwan mynstre.